Monday, August 24, 2015

ሲጠበቅ የነበረው የፍርድ ቤት ውሎ በድጋሚ ለጷግሜ 2 ተቀጠረ።

በዛሬው እለት በከፍተኛ ጉጉት ሲጠበቅ የነበረው የፍርድ ቤት ውሎ በድጋሚ ለጷግሜ 2 ተቀጠረ።
በነሶልያና ሽመልስ የክስ መዝገብ ለመከላከል ወይም ሳይከላከሉ በነፃ ለመሰናበት ውሳኔ ዛሬ ለ35ተኛ ጊዜ ፍርድ ቤት ቀርበው የነበሩት አራቱ በእስር የሚገኙት ጦማርያን በድጋሚ በተለዋጭ ቀጠሮ ተሸኝተዋል።
በዛሬው ውሎ ችሎቱ ያልተሰየመ ሲሆን ተከሳሾች እና ጠበቆች በቢሮ ተጠርተው ዳኞች ተሟልተው ስላልተገኙ ችሎቱ ለመሰየም አለመቻሉን ዶክመንቶችን ማየትና ውሳኔውን ፅፎ ማጠናቀቅ አሁንም እንዳልቻሉ በመግለፅ ዳኛ ዘሪሁን ለጷግሜ 2 ተለዋጭ ቀጠሮ መስጠታቸውን አሳውቀዋል።
መደበኛ የወንጀል ችሎት ከነሃሴ 15 ጀምሮ የተዘጋ ሲሆን የዞን9 ጦማርያን ከመዘጋቱ በኃላ በሁለተኛ ልዩ ቀጠሮ እና በአጠቃላይ 36ኛ ጊዜ ፍርድ ቤት ተመልሰው ይቀርባሉ ።

Wednesday, August 19, 2015

የዛሬው የፍርድ ቤት ውሎ

በሶልያና ሽመልስ የክስ መዝገብ ሶልያና ሽመልስ (በሌለችበት) በፍቃዱ ኃይሉ፣ ናትናኤል ፈለቀ፣ አጥናፍ ብርሃኔ እና አቤል ዋበላ በዛሬው ዕለት ‹ክሳቸውን መከላከል ያስፈልጋቸዋል ወይስ አያስፈልጋቸውም› በሚል የመጨረሻ ውሳኔውን ለመስማት በፍርድ ቤት ተገኝተው ነበር፡፡
በዕለቱ የተሰየመው ችሎት 
‹‹ሰነዱ ሰፊ ነው ብዙ ማንበብ ይጠይቃል በዚህም ምክንያት ችሎቱ የክስ መዝገቡን አይቶ ባለመጨረሱ ለመጪው ሰኞ ተለዋጭ ቀጠሮ ተሰጥቷል» 
በማለት ቀጠሮው መተላለፉ በዳኛው የተነገረ ቢሆንም የፀረ ሽብር ክሶችን የሚያየው 19ኛ ወንጀል ችሎት ነሃሴ 15 ቀን ይዘጋል ተብሎ አስቀድሞ በዳኞች ተነግሮ የነበረ ቢሆንም ግልፅ ባልሆነ ሁኔታ ለነሃሴ 18 የብይን ተለዋጭ ቀጠሮ ተሰጥቷል።
481 ቀናትን በእስር ያሳለፉት ጦማሪያን የሚቀጥለው ቀጠሮአቸው 35ኛው ይሆናል ፡፡ በዕለቱ ከፍተኛ ቁጥር ያላቸው ታሳሪዎች በመገኘታቸው የጦማሪያኑ ቤተሰቦች እና ወዳጆች፣ ጋዜጠኞች እና የዲፕሎማቲክ ኮሚኒቲ አባላት ችሎቱን እንዳይታደሙ ተከልክለዋል፡፡

Tuesday, August 18, 2015

የልጅነቱ ሰለባ - ናትናኤል

‹‹3ኛ ተከሳሽ ናትናኤል ፈለቀ አበራ ከግንቦት 2004 ዓ.ም ጀምሮ ካልተያዙት ግብረአበሮች ጋር በመሆን በሕቡዕ በመደራጀትና የሕቡዕ ድርጅቱ የሀገር ውስጥ አስተባባሪ በመሆን በሥሩ በሚንቀሳቀሱት አባላት የሥራ ክፍፍልና መመሪያ በመሰጠት እራሱን የግንቦት ሰባት ብሎ በሚጠራው አሸባሪ ቡድን ጋር ግንኙነት በመፍጠር የግንቦት ሰባት ልሣን ለአባላት የሚሰጥ የሥራ መመሪያ [እና] (sic) በመቀበል ለአባላቱ በመስጠት ለአመፅና የሽብር ተግባር መፈፀም (sic) በሀገር ውስጥና በውጭ ሀገር ስልጠና በመውሰድ በህቡዕ ቡድኑ መካከል የሚደረገውን የመልዕክት ልውውጥ የመንግስት የፀጥታ አካላት እንዳይደርሱባቸው በመደበቅና በስውር በመገናኝት Security in box (sic)  የህቡዕ ቡድኑ አመራሮች የሚሰለጥኑትን ስልጠና በመሰልጠን፡ ለአባላቱ ሥልጠና እንዲወስዱ በማመቻቸት ለዚሁ የአመፅ ተግባር እንዲውል ውጭ ሀገር ከሚገኙ የቡድኑ አባላት 48,000.00 ብር የተላከትን (sic) ገንዘብ ለቡድኑ አባላት በማከፋፈል የአመፅ ቡድኑ እና የሽብር ቡድኑን በመምራት […] (sic)፤››
ይህ ጦማሪ ናትናኤል ፈለቀ ‹የህብረተሰቡን ሰላም ወይም ጤና ለመንሳት በማሰብ የሽብርተኝነት ድርጊት ሞከሯል፣ አቅዷል፣ አሲሯል፣ አነሳስቷልና ተዘጋጅቷል› በሚል ስለ ፀረ-ሽብርተኝነት የወጣውን አዋጅ ቁጥር 652/2001 አንቀፅ 3(2) እና አንቀፅ 4 ጥሷል በሚል በከሳሽ የፌደራል ዓቃቤ ሕግ የቀረበበት ክስ ነው፡፡
ጉዳዩን እያየ ያለው የፌደራሉ ከፍተኛ ፍርድ ቤት፣ 19ኛ ወንጀል ችሎትም ከሳሽ ያቀረባቸውን ‹የሰነድ ማስረጃዎች› (በነገራችን ላይ ከሳሽ በአጠቃላይ ያቀረባቸው የሰነድ ማስረጃዎችን ብቻ ነው፡፡ የቀረቡት የሰው ምስክሮች የሰነድ ማስረጃዎቹን ትክክለኛነት ለማስረዳት ብቻ የቀረቡ ናቸው) መርምሮ ናትናኤል ፈለቀ መከላከል ሳያስፈልገው በወንጀለኛ መቅጫ ስነስርዓት ሕግ 141 መሰረት ‹ከክሱ በነፃ መሰናበት አለበት› ወይስ በወንጀለኛ መቅጫ ስነ ስርዓት ሕግ 142 መሰረት ‹ክሱን ሊከላከል ይገባዋል› የሚለውን ለመወሰን ቀጠሮ ይዟል፡፡ እኛም ናትናኤል ላይ የቀረቡትን ማስረጃዎች ከቀረበበት ክስ አንፃር መመልከቱ የክሱን ምንነትና ሊጠበቅ የሚችለው/የሚገባው ብይን ምን መሆን አለበት የሚሉትን ጉዳዮች ለመመለስ ይህን ፅሁፍ አቅርበናል፡፡
***
የ16 ዓመቱ ናቲ ዘሚካኤልና ጓደኞቹ ክፍል ውስጥ የተለያዩ ጉዳዮችን እያነሱ መበሻሸቅ አንዱ የትምህርት ቤት ጨዋታቸው ነበር፡፡ ናቲ ዘሚካኤልም ጓደኞቹን ለማብሸቅ በማሰብ አንድ ቀን ርዕስ የሌለው ግጥም ፅፎ ወስዶ ጓደኞቹን አበሸቀ፡፡ ደስ አለው፡፡ ይህ ባለ 16 መስመር ግጥሙ አጀማመሩ አስቂኝ ነው፤ እንዲህ፡
‹‹ኢትዮጵያ ሀገሬ፣ ማንም አይደርስብሽ፣
 ማሰብ የማይችሉ፣ ወታደሮች አሉሽ፡፡››
ግጥሙ ሲጠናቀቅ ደግሞ ‹ገጣሚው› የሚኖርበት ሰፈር በተለምዶ ‹አዲሱ ሚካኤል› የተባለው ሰፈር በመሆኑ ራሱን ‹ናቲ ዘሚካኤል› ብሎ ሰይሞ፤ የግጥሙ ፀሃፊ ‹ናቲ ዘሚካኤል› ብሎ የልጅነት ፊርማውን ‹ልማት የተጠሙ ኢትዮጵያዊያን› ከሚል በእጅ የተሳለ ማህተም ጋር አስቀምጧል፡፡ ልጅነት ደስ ይላል፡፡ ይህ ከሆነ ከ10 ዓመትበኋላ ግን ይህች ግጥም መዘዝ ይዛ መጣች፡፡ የኢትዮጵያ መንግስት 6 ጦማርያንን እና 3 ጋዜጠኞችን ‹ሕገ መንግስታዊ ስርዓቱን በሃይል ለማፍረስ በመሞከር ወንጀል ጠርጥሬያቸዋለሁ› በማለት ሚያዚያ 17 እና 18/2006 ባሰረበት ወቅት ከስድስቱ ጦማርያን አንዱ የሆነው የናትናኤል ፈለቀን ቤት በተፈተሸበት ወቅት ይህች ግጥም በዛኔው ናቲ ዘሚካኤል በአሁኑ ናትናኤል ፈለቀ የልጅነት ደብተር ውስጥ ተገኘ፡፡ ናትናኤል ላይም ‹የሽብር ተግባርን የምታስረዳ አንድ ገፅ የሽብር ሰነድ› ተብላ ‹በማስረጃነት› ቀረበች፡፡ እነሱ ‹ማስረጃ› የሚሉት እንግዲህ እንዲህ ነው፡፡

የሩቅ የሩቁ የሚከተለው ናትናኤል

ናትናኤል ከ10 ዓመት በፊት በልጅነት ዕድሜው የፃፈው ግጥም ‹ማስረጃ› ሆኖ እንደቀረበበት ሁሉ ሌላም በዋነኛ ማስረጃነት የቀረበበት ከ7 ዓመታት በፊት የተከሰተ ጉዳይ አለ፡፡ የግንቦት ሰባት ድርጅት ኒውስሌተር፡፡ ናትናኤል ኢሜል ውስጥ ግንቦት ሰባት የተባለ ፓርቲ መመስረቱን የሚገልፅ በኖቬምበር 02/2008 ከወዳጁ የተላከ የግንቦት ሰባት ኒውስሌተር፡፡ ይሄን የሚመለከት ሰው ኢሜሉ ውስጥ አንድ የፖለቲካ ድርጅትን አስመልክቶ የተፃፈ ፅሁፍ አንድ ሰው ቢገኝበት ታዲያ ምኑ ነው ወንጀል የሚሆነው; ብሎ መጠየቁ አይቀርም፡፡ ጉዳዩ ግን ከዚህም ያልፋል፡፡
  1. ይህ ኢሜል የተላከው የፀረ-ሽብርተኝነት አዋጁ በነሃሴ 22/2001 ከመውጣቱ ከ9 ወራት በፊት በጥቅምት 22/2001 ነው፡፡ ሕግ ወደኋላ ሄዶ አይሰራም (Nonretroactivity of the law) የሚለውን የሕግ መርህ እያሰብን፡፡
  2. ይህ ኢሜል የተላከው ግንቦት ሰባት ለፍትህ እና ለነፃነት ድርጅት ከሌሎች 4 ድርጅቶች ጋር በሕዝብ ተወካዮች ምክር ቤት በፀረ-ሽብርተኝነት አዋጁ አንቀፅ 25 መሰረት ‹የሽብርተኛ ድርጅት› ተብሎ ከመፈረጁ ከ2 ዓመት ከ9 ወራት በፊት ነው፡፡
  3. እሺ ይሁን እንኳን ቢባል ናትናኤል አንድ ኢሜል እንዳይላክለት የማድረግ ምን አቅም አለው; ለዚህ የሚሆን ቴክኖሎጂስ አለን;
  4. ናትናኤል ኒውስሌተሩ ኢሜሉ ውስጥ ከመገኝቱ ውጭ ምን አደረገ; ምንም የቀረበበት ማስረጃ የለም፡፡

በአጠቃላይ ናትናኤል ከልጅነቱ እስከ ወጣትነቱ ድረስ የተከሰሰበት ሕግ ባልወጣበት ጊዜ የፃፈው/ያነበበው እየተከታተለ ዛሬ ‹ማስረጃ› ተብሎ ቀርቦበታል፡፡ አንድን ጉዳይ ወንጀል የሚያደርግ ሕግ በሌለበት አንድ ድርጊት ወንጀል መሆኑስ እንዴት ይታወቃል; ከናትናኤል ነቢይነት ይጠበቅ ነበር ማለት ነው?

‹ባንከር› የመሆን ጣጣ

ከሳሽ ክሱን እውነት ለማስመሰል የተለመደውን ‹ከውጭ ሀገር የተላከለትን ገንዘብ ተጠቅሞ…› የሚል ሀረግ ጦማርያኑና ጋዜጠኞቹ ላይ ያቀረበው ክስ ላይም ተጠቅሟታል፡፡ ናትናኤል ደግሞ የገንዘቡ ተቀባይ ተብሏል፡፡ ክሱ እንዲህ ይላል፡
‹‹…ለአባላቱ ሥልጠና እንዲወስዱ በማመቻቸት ለዚሁ የአመፅ ተግባር እንዲውል ውጭ ሀገር ከሚገኙ የቡድኑ አባላት 48,000.00 ብር የተላከለትን (sic) ገንዘብ ለቡድኑ አባላት በማከፋፈል…››
ለዚህ ማስረጃ ሁኖ የቀረበበት ደግሞ ናትናኤል ከሚሰራበት የኮንስትራክሽንና ቢዝነስ ባንክ ለፌደራል ፖሊስ የተፃፈ እና ለናትናኤል ፈለቀ ኬኒያ ከሚገኝው የአርቲክል 19 የምስራቅ አፍሪካ ቅርንጫፍ  የተላከ 48,000.00 ብር ነው፡፡ ናትናኤል ለፖሊስ ‹በነፃ› ሰጠው የተባለው ቃሉም ላይ ‹‹እኔ የኮንስትራክሽ ቢዝነስ ባንክ ውስጥ ስለምሰራ አርቲክል 19 የተባለ የእንግሊዝ ግብረ ሰናይ ድርጅት በችግር ላይ ያሉ ጋዜጠኞችን የሚረዳ በመሆኑና ርዕዮት አለሙ ያለአግባብ ታስራ ችግር ላይ በመሆኗ በቤተሰቦቿ አማካኝነት እርሷን መርዳት ስለፈለገ በምሰራበት ባንክ በኩል ገንዘቡ ቢላክ በቀላሉ አውጥቼ ለቤተሰቦቿ መስጠት እንደምችል ስለገለፅኩላቸው 48,000.00 የኢትዮጵያ ብር በስሜ ልከውልኝ እኔም አውጥቼ ለርዕዮት ቤተሰቦች ሰጥቻለሁ›› ይላል፡፡ እንግዲህ ይህ ገንዘብ ነው ‹…ለአመፅ ተግባር እንዲውል…› የተባለው፡፡ እንግዲህ አርቲክል 19 ነው ‹…ውጭ ሀገር ከሚገኙ የቡድኑ አባላት…› የተባለው፡፡ ናትናኤል ባንክ መስራቱ ያመጣበት ‹ጉድ› እንግዲህ ይህ ነው፡፡

“እስክንድር ነጋ፣

ርእዮት አለሙ፣ ውብሸት ታዬ፣ አንዷለም አራጌ እና በቀለ ገርባ የተባሉ እስረኞችን ለማስፈታት ሰላማዊ ሰልፎች ላይ እና ድረ ገፅ ተሳትፎ በማድረጌ ጥፋተኛ ነኝ”
ይላል የናትናኤል ፈለቀ ‹የጥፋተኝነት› እምነት ቃል፡፡ የፌደራል ጠቅላይ ፍርድ ቤት በአዋጅ ቁጥር 454/1997 በተሰጠው አስገዳጅ ትርጉም የመስጠት ስልጣን በመዝገብ ቁጥር 77842 እና 77097 ላይ እንዳስረገጠው በወንጀለኛ መቅጫ ሥነ ሥርዓት ሕግ አንቀፅ 27 (2) መሰረት ለፖሊስ ተሰጠ የተባለ ‹ጥፋተኛ ነኝ› የሚል ቃል፤ በወንጀለኛ መቅጫ ሥነ ሥርዓት ሕግ አንቀፅ 35 ለጊዜ ቀጠሮ ፍርድ ቤት የሚሰጥ ‹ጥፋተኛ ነኝ› የሚል ቃል እንዲሁም በወንጀለኛ መቅጫ ሥነ ሥርዓት ሕግ አንቀፅ 134 መሰረት ለመደበኛ ፍርድ ቤት የሚሰጥ ‹ጥፋተኛ ነኝ› የሚል ቃል ‹‹ተጠርጣሪው/ተከሳሹ ‹ጥፋተኛ ነኝ› ስላለ ብቻ ጥፋተኛ ነው ማለት አይደለም› ይልቁንም ቃሉን የሰጠበት መንገድና ጥፋተኛ ነኝ ያለበት ጉዳይ ተመርምሮ ነው ተቀባይነት ሊኖረው የሚገባው›› በማለት አመክኖያዊውን ጉዳይ የሕግ መሰረት አስይዞታል፡፡ ናትናኤልም እንግዲህ በፌደራል ፖሊስ የወንጀል ምርመራ ዘርፍ በቆየባቸው ሰማኒያ አራት ቀናት ውስጥ እጅግ በተራዘመ እና ሃይል በተቀላቀለበት ሁኔታ አንዲፈርም የተደረገበትና በወንጀለኛ መቅጫ ሥነ ሥርዓት ሕግ አንቀፅ 27 (2) መሰረት ለፖሊስ ተሰጠ የተባለ ‹የእምነት ቃል› ከዚህ የሰበር ሰሚ ችሎቱ ውሳኔ አንፃር መታዮት ያለበት ነው፡፡ ይህ የኢፌደሪን ሕገመንግስት አንቀፅ 19 (5) በጣሰ መንገድ በሃይል እና በማሰቃየት የተገኝ ‹ቃል› በይዘቱም እንደሌሎች ተከሳሾች ቃል ሁሉ አስቂኝና አስገራሚ ነው፡፡
‹በግፍ የታሰሩ ሰዎች መታሰር አይገባቸውም በማለት በድረገፅ በመፃፌ ጥፋተኛ ነኝ› የሚል ቃል ምኑ ታምኖ ነው ‹ማስረጃ› የሚሆነው? ‹የአሜሪካ እና የጀርመን የውጭ ጉዳይ ሚኒስትሮችን በማግኝቴና የውጭ ሃይሎችን ድብቅ አጀንዳ ሳላውቅ እነሱ ጋር በመስራቴ ጥፋተኛ ነኝ› በማለት ‹ወንጀሉን› አምኗል ብሎ ለፍርድ ቤት ከሳሽ ‹በማስረጃነት› ቃሉ እንደሆነ የገለፀው ሰነድ የቀረበበት ናትናኤል በዚህ ሰነድ ንፁህ መሆኑን ከሚያረጋግጥ በቀር ሰነዱን ሽብርተኝነትን ያስረዳል ብሎ ማቅረብ ለፍትህ ስርዓቱ ትልቅ ስድብ ነው፡፡
እንግዲህ እነዚህ ‹ማስረጃዎች› እና ናትናኤል ዞን 9 ላይ የፃፋቸው ሰባት ፅሁፎች ናቸው ናትናኤል ላይ ‹የሕብረተሰቡን ወይም የሕብረተሰቡን ክፍል ደህንነት ወይም ጤና ለመንሳት በማሰብ የሽብርተኝነት ድርጊት ለመፈፀም አቅዷል፣ ተዘጋጅቷል፣ አነሳስቷል፣ አሲሯልና ሞክሯል› ለሚለው ክስ ‹ማስረጃ› ሆነው የቀረቡበት፡፡ ታዲያ ናትናኤል ነፃ ከመባል ውጭ ምን ሊባል ይችላል? ምንም! ናትናኤል ነፃ ሰው ነው!
ናትናኤል ፈለቀ

Monday, August 17, 2015

ክሱ ምን እንደሆነ መረዳት የማንችለው - አቤል

‹‹7ኛ ተከሳሽ አቤል ዋበላ ሱጌቦ ከግንቦት 2004 ዓ.ም ጀምሮ የሽብር ቡድኑ መስራችና አባል በመሆን ድርጅታዊ መዋቅር፤ የሥራ መዘርዝር በማዘጋጀት በተሰጠው የሥራ መዘርዝር የሽብር ቡድኑን የውጭና የሀገር ውስጥ አመራሮች ግንቦት ሰባት ከተባለው የአሸባሪ ቡድን ጋር ግንኙነት እንዲፈጥሩ በማድረግና በማደራጀት በሀገር ውስጥና በውጭ ሀገር ስልጠና በመውሰድ በሕቡዕ ቡድኑ መካከል የሚደረገውን የመልዕክት ልውውጥ የመንግስት የፀጥታ አካላት እንዳይደርሱባቸው በመደበቅና በስውር በመገናኝት security in box (sic) የህቡዕ ቡድኑ አመራሮች የሚሰለጥኑትን ስልጠና በመሰልጠን ሁለንተናዊ የትግል አቅጣጫ የግንቦት ሰባት እስትራቴጂ በመቀበልና በመሠልጠን የሽብር ተግባር ለመፈፀም ተሣታፊ (sic) በመሆን ተይዟል፡፡››
ይህ ጦማሪ አቤል ዋበላ ‹የህብረተሰቡን ሰላም ወይም ጤና ለመንሳት በማሰብ የሽብርተኝነት ድርጊት ሞከሯል፣ አቅዷል፣ አሲሯል፣ አነሳስቷልና ተዘጋጅቷል› በሚል ስለ ፀረ-ሽብርተኝነት የወጣውን አዋጅ ቁጥር 652/2001 አንቀፅ 3(2) እና አንቀፅ 4 ጥሷል በሚል በከሳሽ የፌደራል ዓቃቤ ሕግ የቀረበበት ክስ ነው፡፡
ጉዳዩን እያየ ያለው የፌደራሉ ከፍተኛ ፍርድ ቤት፣ 19ኛ ወንጀል ችሎትም ከሳሽ ያቀረባቸውን ‹የሰነድ ማስረጃዎች› (በነገራችን ላይ ከሳሽ በአጠቃላይ ያቀረባቸው ‹የሰነድ ማስረጃዎችን› ብቻ ነው፡፡ የቀረቡት የሰው ምስክሮች የሰነድ ማስረጃዎቹን ትክክለኛነት ለማስረዳት ብቻ የቀረቡ ናቸው) መርምሮ አቤል ዋበላ መከላከል ሳያስፈልገው በወንጀለኛ መቅጫ ስነስርዓት ሕግ 141 መሰረት ‹ከክሱ በነፃ መሰናበት አለበት› ወይስ በወንጀለኛ መቅጫ ስነ ስርዓት ሕግ 142 መሰረት ‹ክሱን ሊከላከል ይገባዋል› የሚለውን ለመወሰን ቀጠሮ ይዟል፡፡ እኛም አቤል ላይ የቀረቡትን ‹ማስረጃዎች› ከቀረበበት ክስ አንፃር መመልከቱ የክሱን ምንነትና ሊጠበቅ የሚችለው/የሚገባው ብይን ምን መሆን አለበት የሚሉትን ጉዳዮች ለመመለስ ይህን ፅሁፍ አቅርበናል፡፡
***
ሚያዚያ ወር መጀመሪያ 2006 አንድ ምሽት ለአቤል ጥሩ ነገርን ይዛ አልነበረም የጠበቀችው፡፡ ሰዓቱ ከምሽቱ ሁለት ሰዓት ትንሽ አለፍ እንዳለ አቤል ከቢሮ ወደ ቤቱ እየገባ እያለ የቤቱ መዳረሻ ጋር ማንነታቸውን ለጊዜው ባልለያቸው ሶስት ሰዎች ከኋላ ተመቶ ራሱን ሳተ፡፡ ከጥቂት ደቂቃዎች በኋላ ሲነቃ ይዞት የነበረው ላፕ ቶፕና የእጅ ስልክ መወሰዳቸውን አረጋገጠ፡፡ በአስገራሚ ሁኔታ የኪስ ቦርሳውና ኪሱን አልተነኩም፡፡ በጊዜው ብዙ ጥርጣሬዎች በብዙ ሰዎች ውስጥ የነበረ ቢሆንም ጉዳዩ ለፖሊስ ሪፖርት ተደርጎ ፖሊስም መልስ አልሰጠም ነበር፡፡ የአቤል ላፕ ቶፕና ስልክ አቤል በተያዘበት ዕለት በእጁ አለመያዙ አስሮ ማስረጃ ለሚፈልገው ፖሊስ ትልቅ የራስ ምታት ነበር፡፡ ሌሎች ተከሳሾች ላይ እንዳደረጉት ላፕ ቶፑ ውስጥ ያገኙትን አንዱን መፅሃፍ ፕሪንት አድርገው በቃ ‹ማስረጃ› ነው እንዳይሉ አደረጋቸው፡፡
ነገር ግን አንድ ጥሩ መፍትሔ አገኙ፤ ምስጋና አቤል በታሰረ ዕለት ኪሱ ውስጥ የተገኝ ፍላሽ ዲስክ፡፡ አቤል ዋበላ ላይ የቀረቡት ሁሉም ማስረጃዎች አቤል በታሰረበት ዕለት ይዞት ከነበረው ፍላሸ ላይ ፕሪንት የተደረገ ነው፡፡ እዚህ ፍላሽ ውስጥ ደግሞ አንድ ስለኢንክሪፕሽን የሚያትት አጭር ፅሁፍ እና ኮሮጆ ዶት ኮም የተባለ የዌብሳይት ምክረ ሐሳብ(proposal) ነበሩ፡፡ በቃ አቤል ‹የሕብረተሰቡን ወይም የሕብረተሰቡን ክፍል ደህንነት ወይም ጤና ለአደጋ ለማጋለጥ በማሰብ የሽብርተኝነት ድርጊት ለመፈፀም አቅዷል፣ ተዘጋጅቷል፣ አነሳስቷል፣ አሲሯል እና ሞክሯል› ተብሎ ለቀረበበት ክስ ‹ማስረጃ› ተብለው የቀረቡበት እነዚህ ሁለቱ ሰነዶች ብቻ ናቸው! (‹ … ድርጅታዊ መዋቅር፤ የሥራ መዘርዝር በማዘጋጀት … › ተብሎ በከሱ ውስጥ የቀረበው ጭብጥ እና እሱን ያስረዳል ተብሎ የቀረበው ‹ማስረጃ› በመቃወሚያ ብይን ውድቅ መደረጉ ይታወቃል)  አሳዛኙ ጉዳይ ይሄ ነው፡፡ ‹ስለ ኢንክሪፕሽን ፅሁፍ ፍላሽህ ውስጥ ተገኝቷል፤ በቃ ወንጀለኛ ነህ› የሚለውን ቧልት እንተወውና እስኪ ኮሮጆ ዶት ኮም የተባለውን የዌብሳይት ፕሮፖዛል እንመልከት፡፡
ኮሮጆ ዶት ኮም
ይህ የዌብሳይት ምክረ ሐሳብ በዞን ዘጠኝ ኢ-መደበኛ የጦማሪያን ቡድን ምርጫ 2007ን አስመልክቶ (‹ምርጫ› ይኖራል በሚል ተስፋ) ለበይነ መረቡ ማህበረሰብ (online community) መረጃ ለመስጠት በማሰብ የተዘጋጀ ሲሆን፤ በምክረ ሐሳቡ ላይ የተቀመጡትን ዓላማዋች እና ዌብሳይቱ እንደ ግብ አድርጎ የወሰዳቸውን ግቦች የተመለከተ ሰው ከሳሹ አካል ይሄን ምክረ ሐሳብ ለወንጀል ድርጊት ‹ማስረጃ› ይሆነኛል ብሎ ማቅረቡ ለሕጉም ሆነ ለፍትህ ስርዓቱ ያለውን ንቀት ነው የሚገነዘበው፡፡ ለመሆኑ ስለ ምርጫ ለመዘገብ የተዘጋጀ የዌብሳይት ምክረ ሐሳብ ‹ከሽብርተኝነት› ጋር ምን ያገናኝዋል; ማለታችን አይቀርም፡፡ እንግዲህ ይህ ነው አቤልና ጓደኞቹ የሕብረተሰቡን ደህንነት እና ጤና ለመንሳት አቅደው ሲንቀሳቀሱ ነበር ያስባላቸው፡፡  
ከ15 ዓመት እስከ ሞት

አቤልና ጓደኞቹ ተከሰው ክሳቸውን እየተከታተሉ የሚገኙ ሲሆን የተከሰሱበት አንቀፅ ደግሞ ከ15 ዓመት ፅኑ እስራት እስከ ሞት ድረስ ሊያስፈርድ የሚችል ነው፡፡ እንግዲህ አቤል የዌብሳይት ፕሮፖዛል ፍላሽህ ውስጥ ስለኢንክሪፕሽን ከሚያትት ሌላ ፅሁፍ ጋር ተገኝቶብሃል ተብሎ ነው ይህ ከፍተኛ ፍርድ ሊያስፈርድ የሚችል አንቀፅ ተጠቅሶ አቤል ላይ ክስ የቀረበበት፡፡ የአቤል ብቸኛው ጥፋት በሀገሩ ሰላማዊ ዜጋ ሁኖ መኖሩ ካልሆነ በስተቀር እነዚህን ሰነዶች አቅርቦ የወንጀል ክስ መመስረት በራሱ እጅግ ያስደነግጣል፡፡ አቤል እና ጓደኞቹ ላለመታሰር ምን ማድረግ እንዳለባቸው እንኳን ግልፅ አይደለም፡፡ የት ይኑሩ? ምን ያድርጉ? የሚለውን ስናስብ መልስ መስጠት አንችልም፡፡ አዎ! አቤል ነፃ ሰው ነው!
አቤል ዋበላ

አጥናፉ እና ከማሳቅ ውጭ ሌላ ነገር የማያስረዱት ‹ማስረጃዎች›

‹‹5ኛ ተከሣሽ አጥናፉ ብርሃኔ አያሌው፡- ከግንቦት 2004 ዓ.ም ጀምሮ ለሽብርና ለአመፅ በተደራጀው ህቡዕ ቡድን  ውስጥ መስራችና አባል በመሆን የህቡዕ ቡድኑ የተቀበለውን የግንቦት ሰባት እሥትራቴጂና አካሄድ በመቀበል ከሀገር ውስጥና ውጭ ሀገር ካሉ የህቡዕ ቡድኑ መዋቅር አመራሮች ጋር በመገናኝት ተልዕኮና መመሪያ በመውሰድ በመመሪያው (sic) መሣካት የተለያዩ ሥልጠናዎች በመሠልጠንና በማሠልጠን ማለትም በህቡዕ ቡድኑ መካከል የሚደረገውን የመልዕክት ልውውጥ የመንግስት የፀጥታ አካላት እንዳይደርሱባቸው በመደበቅና በስውር በመገናኝት Security in box (sic) የህቡዕ ቡድኑ አመራሮች የሚሰለጥኑትን ስልጠና በመሰልጠን፡ በተጨማሪም ሀገር ውስጥ አመፅ እንዴት ማቀጣጠል እንደሚቻል የአመፅ መገልገያ መሣሪያዎች ቦንብ፤ ጭምብል፣ ድንጋይ፣ የፀጥታ አካልን በዘር በመለያየት የፀጥታ ኃይሎችን መተንኮስ የሚል ሥልጠና በመውሰድ ሁለንተናዊ የትግል አቅጣጫ የሚለውን የግንቦት ሠባት እስትራቴጂ በመቀበልና በማሠልጠን የሽብር ተግባር ለመፈፀም ሲንቀሳቀስ ተይዟል፤››
ይህ ጦማሪ አጥናፉ ብርሃኔ ‹የህብረተሰቡን ሰላም ወይም ጤና ለመንሳት በማሰብ የሽብርተኝነት ድርጊት ሞክሯል፣ አቅዷል፣ አሲሯል፣ አነሳስቷልና ተዘጋጅቷል› በሚል ስለ ፀረ-ሽብርተኝነት የወጣውን አዋጅ ቁጥር 652/2001 አንቀፅ 3(2) እና አንቀፅ 4 ጥሷል በሚል በከሳሽ የፌደራል ዓቃቤ ሕግ የቀረበበት ክስ ነው፡፡
ጉዳዩን እያየ ያለው የፌደራሉ ከፍተኛ ፍርድ ቤት፣ 19ኛ ወንጀል ችሎትም ከሳሽ ያቀረባቸውን የሰነድ ማስረጃዎች (በነገራችን ላይ ከሳሽ በአጠቃላይ ያቀረባቸው የሰነድ ማስረጃዎችን ብቻ ነው፡፡ የቀረቡት የሰው ምስክሮች የሰነድ ማስረጃዎቹን ትክክለኛነት ለማስረዳት ብቻ የቀረቡ ናቸው) መርምሮ አጥናፍ ብርሃኔ መከላከል ሳያስፈልገው በወንጀለኛ መቅጫ ስነስርዓት ሕግ 141 መሰረት ‹ከክሱ ነፃ መሰናበት አለበት› ወይስ በወንጀለኛ መቅጫ ስነ ስርዓት ሕግ 142 መሰረት ‹ክሱን ሊከላከል ይገባዋል› የሚለውን ለመወሰን ቀጠሮ ይዟል፡፡ እኛም አጥናፉ ላይ የቀረቡትን ማስረጃዎች ከቀረበበት ክስ አንፃር መመልከቱ የክሱን ምንነትና ሊጠበቅ የሚችለው/የሚገባው ብይን ምን መሆን አለበት የሚሉትን ጉዳዮች ለመመለስ ይህን ፅሁፍ አቅርበናል፡፡
***
ኢንተርፕረነሩ Richard Branson እና ሙዚቀኛው  Peter Gabriel በተለያዩ ጊዜያት የግል ውይይት ሲያደርጉ አንድ ጉዳይ ሲያሳስባቸው ነበር፡፡ በሁሉም የዓለም ክፍል አዛውንቶች (elders) የተከበሩና በማህበረሰቦች ውስጥ ለሚፈጠሩ ችግሮች እንደዋነኛ የችግር መፍትሄዎች ተደርገው ይወሰዳሉ፤ ታዲያ አሁን ባለው አንድ ትልቅ መንደር (global village) እነዚህ ሽማግሌዎች ዓለም ላይ ላሉ ችግሮች መፍትሄ ይሆኑ ዘንድ ስመጥር የሆኑ ታላላቅ ሰዎች አንድ ላይ ሁነው ለምን አይሰሩም; የሚለው ጥያቄ፡፡ ለጥያቄያቸው መፍትሄ ይሆን ዘንድም ይሄን ሃሳባቸውን ለኔልሰን ማንዴላ አቀረቡላቸውና በጁላይ 2007 ሽማግሌዎቹ (The Elders) የተባለው ዓለማቀፍ ቡድን ተቋቋመ፡፡ ቡድኑ በዋነኝነት የያዘው ዓላማም ዓለማቀፍ የሰው ልጆችን ትስስር ማበልፀግና ለዓለማቀፍ የሰብዓዊ መብቶች መከበር መቆምን ሆነ፡፡ ይህ ቡድን ባለፉት 8 ዓመታት የተለያዩ ሰዎችን ወደ አባልነት እየቀላቀለ ከፍታውን እየጨመረ የመጣ ሲሆን በጁላይ 2013 ፓኪስታናዊቱን የሕግ ባለሙያና የሰብዓዊ መብት ኮከብ Hina Jilaniን በአባልነት አካቷል፡፡ ጂላኒ ሽብርተኝነትን አምርረው ከሚታገሉ ዓለማቀፍ ስብዕናዎች አንዷ ሲሆኑ፤ ለሽብርተኝነት ዋነኛ መታገያው ቦታም ፍርድ ቤቶች መሆን እንዳለባቸው ሲገልፁ፡
"When you put them [terrorists] on trial, you show the wickedness of their crime. Once it becomes abundantly clear that the terrorists' victims are almost entirely comprised of Pakistani civilians, only then will sympathy for their cause be lost. We have to deal with terrorism as a criminal element."
ነበር ያሉት፡፡ ጂላኒ የሰው ልጆችን ሰላም እና ደህንነት ለማስጠበቅ እየተንቀሳቀሱ ያሉ ሰው ይሁኑ እንጅ ኢትዮጵያ ውስጥ ግን እርሳቸው የፃፉትን ፅሁፍ ይዞ መገኝት የሽብርተኝነት ድርጊትን ለመፈፀም እንደመዘጋጀት ተቆጥሮ በማስረጃነት ለፍርድ ቤት ቀርቧል፡፡ ማን ላይ? አጥናፉ ብርሃኔ ላይ፡፡ አጥናፉ ብርሃኔ ላይ በከሳሽ በዋነኛነት የቀረበው የሰነድ ማስረጃ የኦክስፎርድ ዩኒቨርስቲ ፕሬስ በኖቬምበር 2013 ‹International Human Rights Law› በሚል ርዕስ ያሳተመው መፅሃፍ ሲሆን፤ በተለይም ከላይ በመግቢያችን የጠቀስናቸው ወ/ሮ ሂና ጂላኒ፤ የተባበሩት መንግስታት ድርጅት የሰብዓዊ ኮሚሽን ዋና ኮሚሽነር ወ/ሮ ናቪ ፒላይ እና የሂውማን ራይትስ ዎች ዋና ሃላፊ ኬኔት ሮዝ ለዚህ መፅሃፍ ሁለተኛ እትም (Second edition) የፃፉት መግቢያዎች (prefaces) ናቸው ከነእንግሊዝኛ ቅጃቸው በፍርድ ቤቱ የስራ ቋንቋ በአማርኛ ተተርጉመው ‹ከአጥናፉ ብርሃኔ ቤት የተገኙ የሽብር ሰነዶች› ተብለው የቀረቡት፡፡ ይህ ብዙ ሰዎችን ሊያስገርም ይችላል፤ ግን መራራው እውነት ይህ ነው፡፡
Aristotle, Eminem and Homer Simpson
ታላቁ Aristotle ከሁለት ሽህ ዓመታት በፊት ‹የሴቶች የጥርስ ብዛት ከወንዶች በቁጥር ያንሳል› ማለቱን ዛሬ ላይ ሆነን ስናስበው እጅግ የሚያስቅ ቢሆንምና ብዙዎቹም አሪስቶትልን ሲተቹ ይህን ሃሳቡን የሚመዙ ቢሆንም ነገር ግን አሪስቶትል ሪሂቶሪክን አስመልክቶ ከሚጠቀሱ ድንቅ አዕምሮዎች አንዱ ነው፡፡ … ለዚህ ዘመን ወጣቶች አዲስ ያልሆነ ስም ነው፡፡ በዘፈኖቹ ‹ብልግናን› ይሰብካል እየተባለም ቢተችም ቀልብ ሳቢነቱ ግን ብዙም የማይካድ ነው፡፡ … ላለፉት 35 ዓመታት እጅግ የተወደደው የሲምፕሰን ቤተሰብ አባዎራ (ገፀ ባህርይ) ሲሆን በተቃራኒው በሆሜር ሲምፕሰን ንግግሮች ተከፍተው ፕሮግራሙን በሀገራቸው እንዳይታይ የከለከሉ ሀገሮችም አሉ፡፡ Jay Heinrichs የተባሉ ፀሃፊም "Thank You for Arguing: What Aristotle, Eminem and Homer Simpson Can Teach Us About the Art of Persuasion" ባሉት መፅሃፋቸው ‹ተናግሮ የማሳመንን› ጥበብ ከነዚህ ሶስት የተለያዩ እንዴት መማር እንችላለን በማለት እጅግ የተወደደላቸውን መፅሃፍ ፅፈዋል፡፡ የእድል ነገር ሆነና ከዚህ መፅሃፍ ላይ የተወሰደ (adapted) ፅሁፍ (ስለ ‹ድርድር እና ተናግሮ የማሳመን ጥበብ› የሚያትት) አጥናፉ ብርሃኔ ቤት ተገኝ፤ አጥናፉ የሽብር ድርጊት ሊፈፅም በዝግጅት ላይ እንደነበር ያስረዳልም ተብሎ ለፍርድ ቤት ቀረበ፡፡ ፍርድ ቤቱም ይህ ፅሁፍ ቤቱ ተገኝቷል ተባለው አጥናፉ ላይ ብይን ለማሳለፍ በዛውም Aristotle፤ Eminem እና Homer Simpson በኢትዮጵያ ውስጥ ያላቸውን ህግ ከለላ ለመወሰን ቀጠሮ ይዟል፡፡
Internet Security
አጥናፉ የአይቲ ባለሙያ ከመሆኑ አንፃር ከኢንተርኔት እና መሰል ከሙያው ጋር የተገናኙ ነገሮችን የሚመለከቱ ጉዳዮች ላይ ትኩረት ማድረጉ የሚጠበቅ ነው፡፡ የአይቲ ባለሙያነቱ ግን በመጨረሻ አስገራሚ ነገር ይዞ መጣ፡፡ ክስ፡፡ ከላይ ከተጠቀሱት ማስረጃዎች በተጨማሪ አጥናፉ ላይ የቀረቡት ማስረጃዎች በሙሉ ከኢንተርኔት እና ኢንተርኔት ሰኪዩሪቲ ጋር የተያያዙ ናቸው፡፡ ማለትም መፅሃፍት፡፡ ፖሊስ እንደለመደው ካሰረ በኋላ ማስረጃ በመፈለግ ጥበቡ የአይቲ ባለሙያው አጥናፉ ቤት ብዛት ያላቸው ከኮምፒውተር ጋር የሚገናኙ መፅሃፍትና ፅሁፎች አገኘ፡፡ ስለኢንክሪፕሽን እና ጠንካራ ፓስዎርድ ስለመፍጠር (password generation) የሚያትቱትን ገፆች ኮፒ በማድረግ አጥናፉ ‹የሽብርተኝነት ድርጊት ሊፈፅም ሲዘጋጅ ያዝነው› ለሚለው ክሱ በማስረጃነት አቀረባቸው፡፡ ጠንካራ ፓስወርድ መፍጠር የሁሉም ኢንተርኔት ተጠቃሚ ፍላጎት መሆኑ አያጠያይቅም፡፡ እንዴት ጠንካራ ፓስወርድ መፍጠር ይችላሉ የሚል መፅሃፍ ይዞ መገኝት ደግሞ አሁን ባለው አካሔድ ለሽብርተኝነት ወንጀል ክስ ማስረጃ ሁኖ የሚቀርብ ነገር ነው፡፡ ይሄ እብደት ቢመስልም እውነት ሁኖ አጥናፉ ላይ በዋነኛ ማስረጃነት የቀረበ ጉዳይ ነው፡፡ ስለኢንተርኔት ሰኪዩሪቲ ለማወቅ መጣር ኢንሰኪዩር ያደርጋል ነው ነገሩ፡፡
‹ሥልጠና›
ስለ ኢንተርኔት ሰኪዩሪቲ አንብበሃል - ሰልጥነሃል (‹የሽብር ሥልጠና›) ከሚለው አስገራሚ ክስ ባለፈ አጥናፉ ላይ የቀረበ በጣም አስገራሚ የሥልጠና አይነትም አለ፡፡ የከሳሽ ክስ እንዲህ ይለዋል፡
‹‹… በተጨማሪም ሀገር ውስጥ አመፅ እንዴት ማቀጣጠል እንደሚቻል የአመፅ መገልገያ መሣሪያዎች ቦንብ፤ ጭምብል፣ ድንጋይ፣ የፀጥታ አካልን በዘር በመለያየት የፀጥታ ኃይሎችን መተንኮስ የሚል ሥልጠና በመውሰድ …››
ይሄን የክስ ጭብጥ በሕግ አግባብ እና ለዚህ በማስረጃነት የቀረበውን ሰነድ መመልከቱ ነገሩን የበለጠ ግልፅ ስለሚያደርገው እንዲህ እንየው፡፡ የፌደራል ጠቅላይ ፍርድ ቤት በአዋጅ ቁጥር 454/1997 በተሰጠው አስገዳጅ ትርጉም የመስጠት ስልጣን በመዝገብ ቁጥር 77842 እና 77097 ላይ እንዳስረገጠው በወንጀለኛ መቅጫ ሥነ ሥርዓት ሕግ አንቀፅ 27 (2) መሰረት ለፖሊስ ተሰጠ የተባለ ‹ጥፋተኛ ነኝ› የሚል ቃል፤ በወንጀለኛ መቅጫ ሥነ ሥርዓት ሕግ አንቀፅ 35 ለጊዜ ቀጠሮ ፍርድ ቤት የሚሰጥ ‹ጥፋተኛ ነኝ› የሚል ቃል እንዲሁም በወንጀለኛ መቅጫ ሥነ ሥርዓት ሕግ አንቀፅ 134 መሰረት ለመደበኛ ፍርድ ቤት የሚሰጥ ‹ጥፋተኛ ነኝ› የሚል ቃል ‹‹ተጠርጣሪው/ተከሳሹ ‹ጥፋተኛ ነኝ› ስላለ ብቻ ጥፋተኛ ነው ማለት አይደለም› ይልቁንም ቃሉን የሰጠበት መንገድና ጥፋተኛ ነኝ ያለበት ጉዳይ ተመርምሮ ነው ተቀባይነት ሊኖረው የሚገባው›› በማለት አመክኖያዊውን ጉዳይ የሕግ መሰረት አስይዞታል፡፡
የአጥናፉን ጉዳይ ስንመለከት አጥናፉ ላይ ከላይ የተጠቀሰውን ‹ሥልጠና› ወስዷል ለማለት በማስረጃነት የቀረበው አጥናፉ በፌደራል ፓሊስ የወንጀል ምርመራ ዘርፍ (ማዕከላዊ) በነበረበት ወቅት በወንጀለኛ መቅጫ ሥነ ሥርዓት ሕግ አንቀፅ 27 (2) መሰረት ለፖሊስ ሰጠው የተባለ ቃል ሲሆን፡፡ በመጀመሪያ አጥናፉ እንዲፈርም የተደረገው በሌሊት በተደጋጋሚ በተፈፀመበት ድብደባና እና ማሰቃየት (‹‹ጦማር የሚለው ምህፃረ ቃል ነው፤ ስለዚህ ‹ጦ› ምን እንደሆነች፣ ‹ማ› ምን እንደሆነች እንዲሁም ‹ር› ምን እንደሆነች ተናገር›› የሚለውን ጨምሮ) ምክንያት ሲሆን ይህ ‹ሰነድ› ከኢፌዴሪ ሕገ መንግስት አንቀፅ 19 (5) እና ከራሱ ከወንጀለኛ መቅጫ ሥነ ሥርዓት ሕግ አንቀፅ 27 (2) ጋር በግልፅ የሚጋጭ ነው፡፡ ምክንያቱም አጥናፉ በሕግ የተሰጡትን የታሰሩ ሰዎች መብቶት (በተለምዶ Miranda Rights የሚባሉት) ሙሉ ለሙሉ ተነፍጎት የተገኘ በመሆኑ፡፡
አስገራሚውና ሁለተኛው ጉዳይ ደግሞ በድብደባ አጥናፉ ‹የፈንጅ እና የአመፅ ስልጠና ወስጃለሁ› በማለት እንዲፈርም የተደረገው ቃል ላይ ይህን ስልጠና ሰጥቷል የተባለው ድርጅት ነው፡፡ ለአጥናፉ በክሱ የተጠቀሰውን ስልጠና ሰጥቶታል የተባለው ድርጅት በ1968 የተመሰረተው እና መቀመጫውን ዋሽንግተን ዲሲ ያደረገው International Research and Exchanges Board (IREX) ነው፡፡ ትምህርት፣ ሚዲያ እና ሲቪል ሶሳይቲን ዋነኛ አጀንዳው በማድረግ ዓለማቀፍ ልማትን ማምጣት ዓላማው ያደረገው IREX ለአጥናፉ የአመፅ ስልጠና ሰጥቶታል ተብሏል እንግዲህ (በነገራችን ላይ … ማን እንደሆነ ማወቅ ፍርድ ቤቱ በራሱ ቅቡል ግምት (judicial notice) ሊይዝበት የሚገባ ጉዳይ ነው)፡፡ ይህ እጅግ የሚያስቅም ጉዳይ ነው፡፡ ‹የአመፅ እና የተቀጣጣይ ፈንጅ ስልጠና IREX ከተባለ ድርጅት በማግኝቴ ጥፋተኛ ነኝ› የሚለው ቃል ‹እኔና ጓደኞቼ ፀሃይን ጨምሮ 10 ሌሎች ከዋክብትን ሰርቀን ወደ ውጭ ሀገር በመላካችን ጥፋተኛ ነኝ› ከሚለው ቃል በምን ይለያል; ከዚህ የበለጠ የሚያስቅ ነገርስ ምን ይኖራል; ፖሊስም ይሄን እንደማስረጃ ብሎ ለፍርድ ቤት ሲያቀርብ ለፍርድ ቤቱ ያለውን ንቀት ቢያሳይ እንጅ ሌላ ነገርን የሚያመላክት አይደለም፡፡ ከላይ የተጠቀሱት የሰበር ውሳኔዎችም ፍርድ ቤቶች እንደዚህ አይነት ጉዳዮች ላይ ትኩረት አድርገው የተከሳሾችን መብት እንዲያስከብሩ በማሰብ የተሰጡ አስገዳጅ ትርጉሞች ናቸው፡፡

እንግዲህ አጥናፉ ብርሃኔ ላይ የቀረቡት ማስረጃዎች (ማይክሮ ኢኮኖሚክስ ደብተሩን ጨምሮ) አስገራሚነታቸው እና አስቂኝነታቸው እጅግ የበዙ ከመሆናቸው ባለፈም ፍርድ ቤቶች እንዲህ አይነት ማስረጃዎች እየቀርቡላቸው የተከሳሹን ንፅህና ከማዎጅ ያነሰ ውሳኔ መስጠት ያስችላቸዋል ወይ ያስብላል፡፡ አጥናፉስ ንፁህ ሰው ከመባል በቀር ምን ሊባል ይችላል; ምንም! አጥናፉ ‹ተከላከል› ቢባል የሚከላከለውስ ምኑን ነው? Hina Jilani እና Navenatum Pillay አሸባሪ አለመሆናቸውን ነው? ወይስ Homer Simpsonን ምስክርነት ሊጠራ ነው? ወይስ የአይቲ ባለሙያ አይደለሁም ብሎ ሊከላከል ነው? ወይስ ‹IREX የኢትዮጵያ መንግስት ጨምሮ በመላው ዓለም ከተለያዩ አካላት ጋር ዓለምን መልካም ለማድረግ የሚሰራ ድርጅት ነው› ብሎ ነው? … አዎ አጥናፉ ነፃ ሰው ነው!
አጥናፉ ብርሃኔ